ពិភពលោក៖ សមាជិកអង្គការពាណិជ្ជកម្មពិភពលោក (World Trade Organization) បានព្រមព្រៀងកាលពីថ្ងៃពុធកន្លងទៅ អំពីការបើកការចរចាជាផ្លូវការមួយស្តីពីផែនការក្នុងការបង្កើនការផ្គត់ផ្គង់វ៉ាក់សាំងបង្ការកូវីដ-១៩ ទៅដល់បណ្តាប្រទេសកំពុងអភិវឌ្ឍន៍ ប៉ុន្តែជួបប្រទះបញ្ហាមួយចំនួនពោលគឺពាក់ព័ន្ធទៅនឹងការខ្វែងគំនិតគ្នាលើកម្មសិទ្ធិបញ្ញា។

ឥណ្ឌា និងអាហ្វ្រិកខាងត្បូង ដែលគាំទ្រដោយប្រទេសមួយចំនួនផ្សេងទៀត បានជំរុញឱ្យមាននូវការលះបង់ការទាមទារនូវកម្មសិទ្ធិបញ្ញារយៈពេល ៨ខែបណ្តោះអាសន្នសិន ទៅលើវ៉ាក់សាំង និងការព្យាបាលនានាពាក់ព័ន្ធនឹងកូវីដ-១៩។ ការទាមទារនេះបានធ្វើឡើង ក្នុងគោលបំណងជំរុញឱ្យរោងចក្រក្នុងស្រុកនានាអាចបង្កើននូវការផលិត និងផ្គត់ផ្គង់វ៉ាក់សាំងក្នុងប្រទេសរបស់ខ្លួន និងជាដំណោះស្រាយ ក៏ដូចជាការឆ្លើយតបចាំបាច់ទៅនឹងបញ្ហាដែលគេហៅថា ភាពមិនស្មើគ្នានៃការផ្គត់ផ្គង់វ៉ាក់សាំងទៅបណ្តាប្រទេសនីមួយៗជុំវិញពិភពលោក។ 

ប្រទេសអភិវឌ្ឍន៍ដែលជាមូលដ្ឋាននៃក្រុមហ៊ុនឱសថធំៗជាច្រើនបានជំទាស់នឹងការលើកឡើង ដោយលើកហេតុផលថាការលះបង់កម្មសិទ្ធិបញ្ញានេះនឹងមិនជម្រុញសង្វាក់ផលិតកម្មឱ្យមានការកើនឡើងនោះឡើយ ផ្ទុយទៅវិញ វាអាចធ្វើឱ្យប៉ះពាល់ និងខូចខាតដល់ការស្រាវជ្រាវនិងការអភិវឌ្ឍនាពេលអនាគតលើវ៉ាក់សាំងនិងការព្យាបាលកូវីដ-១៩។

មន្ត្រីពាណិជ្ជកម្មទីក្រុងហ្សឺណែវបាននិយាយថា​ សមាជិករបស់អង្គការពាណិជ្ជកម្មពិភពលោកបានយល់ព្រមចាប់ផ្តើមការពិភាក្សានៅថ្ងៃទី ១៧ ខែមិថុនាខាងមុខនេះ ដើម្បីកំណត់ទម្រង់នៃការចរចានិងដើម្បីបង្កើតរបាយការណ៍ដែលបង្ហាញពីវឌ្ឍនភាពរបស់ពួកគេស្តីពីផែនការផ្គត់ផ្គង់វ៉ាក់សាំងនៅត្រឹមថ្ងៃទី ២១-២២ ខែកក្កដាក្នុងកិច្ចប្រជុំរបស់ក្រុមប្រឹក្សាទូទៅនៃអង្គការពាណិជ្ជកម្មពិភពលោក៕